ប្រធានទទួលបន្ទុកកិច្ចការឥស្លាមនៃរដ្ឋជូហូរ ដឹកនាំគណប្រតិភូចូលរួមពិធីប្រគល់​ទទួលវិហារ​ឥស្លាម ដារុល តាក់ហ្ស៊ីម ដែលមានតម្លៃជាង១លានដុល្លារ នៅភូមិ​ចាមលើ ខេត្តកណ្តាល

កណ្តាល៖ គណៈប្រតិភូជាន់ខ្ពស់នៃក្រុមប្រឹក្សាឥស្លាមនៃរដ្ឋជូហូរ ប្រទេសម៉ាឡេស៊ី ដឹកនាំ​ដោយ​ប្រធានទទួលបន្ទុកកិច្ចការឥស្លាម រួមមាន មុហ្វតី, ប្រធាននាយកដ្ឋានអភិវឌ្ឍឥស្លាម, ទីប្រឹក្សា, និង​មន្ត្រី​ជាន់​ខ្ពស់​ជាច្រើនរូបផ្សេងទៀត បានអញ្ជើញចូលរួមពិធីប្រគល់និងទទួលវិហារឥស្លាម ដារុល តាក់ហ្ស៊ីម ស្ថិតនៅភូមិចាមលើ ឃុំព្រែកថ្មី ស្រុកកោះធំ ខេត្តកណ្តាល។ ពិធីនេះក៏បាន​ធ្វើឡើង​ក្រោមវត្តមានកិត្តិយស​ពីលោក ឧកញ៉ា សុះ កំរី ចាងហ្វាងនៃគណៈដឹកនាំ​ជាន់ខ្ពស់នៃសាសនា​ឥស្លាមកម្ពុជា និងប្រ​ជា​ពលរដ្ឋយ៉ាងច្រើនកុះករ នាព្រឹកថ្ងៃ​ទី​១ ខែសីហា ឆ្នាំ២០២២។

នាក្នុងឱកាសនោះ ឯកឧត្តម ហូសេន មហាំម៉ាត់ហ្វារីត ទីប្រឹក្សាក្រសួងធម្មការនិងសាសនា និងជា​ប្រធានអង្គការសម្ព័ន្ធបញ្ញវ័ន្តមូស្លីមកម្ពុជា ដែលជាអ្នកអនុវត្តគម្រោងសាងសង់វិហារឥស្លាមនេះ បានមានប្រសាសន៍អោយដឹងថា វិហារឥស្លាម ដារុល តាក់ហ្ស៊ីម មានកម្ពស់២ជាន់ ទំហំ 23m x 52m អាចទទួលអ្នកថ្វាយបង្គំសរុប៣ពាន់នាក់ និងចំណាយថវិកាសាងសង់សរុបជាង ១លាន និង៣​សែន​ដុល្លារអាមេរិក។

ឯកឧត្តម បានចូលរួមអបអរសាទរទៅដល់ប្រជាពលរដ្ឋខ្មែរឥស្លាមនៅភូមិចាមលើទាំងអស់ ដែលទទួលបានវិហារដ៏ធំទី២ បន្ទាប់ពីវិហារអាល់សារកាល់បឹងកក់ ក្រោមកិច្ចខិតខំប្រឹងប្រឹងពី ឯកឧត្តម ផ្ទាល់និងសហការីតាំងពីឆ្នាំ២០១៥ កន្លងទៅ ដោយមានឯកឧត្តម ចៅ តុល នាយរងខុទ្ទការល័យ​សម្តេច​តេជោ ជាប្រ​ធានកិត្តិយសនៃគណៈកម្មការសាងសង់ និងឯកឧត្តម ឧត្តមសេនីយ៍ត្រី ឡា ឡៃ មេបញ្ជាការកងរាជអាវុធហត្ថខេត្តតាកែវ ជាប្រធានគណៈកម្មការសាងសង់។

ឯកឧត្តម ក៏បានថ្លែងអំណរគុណដល់សប្បុរសជនទាំងអស់ ពិសេសក្រុមប្រឹក្សាឥស្លាមរដ្ឋជូហូរ និងឯកឧត្តម ចៅ តុល ផ្ទាល់ដែលបានចូលរួមផ្តល់ថវិកាក្នុងការកសាងវិហាររហូតដល់បានរួចរាល់ជាស្ថាពរ និងរៀបចំពិធីប្រគល់ទទួលនាពេលនេះ។

ជាមួយគ្នានោះ ក្នុងនាមឯកឧត្តម ចៅ តុល នាយរងខុទ្ទការល័យសម្តេចតេជោ ហ៊ុន សែន និងជាប្រ​ធានកិត្តិយសនៃគណៈកម្មការសាងសង់វិហារឥស្លាម ដារុល តាក់ហ្ស៊ីម ឯកឧត្តម ឧត្តមសេនីយ៍ត្រី ឡា ឡៃ មេបញ្ជាការកងរាជអាវុធហត្ថខេត្តតាកែវ និងជាប្រធានគណៈកម្មការសាងសង់វិហារ បាន​ចូល​រួមអបអរសាទរនិងដឹងគុណចំពោះអល់ឡោះជាម្ចាស់និងសប្បុរសជនទាំងអស់ ដែល​បានចូល​រួមកសាងវិហារដ៏ធំសម្រាប់ប្រជាពលរដ្ឋនៅក្នុងប្រទេសកម្ពុជា ជាពិសេស ក្រុមប្រឹក្សាឥស្លាមរដ្ឋជូហូរ ដែលបានផ្តល់ថវិកាសាងសង់វិហារ តាមរយៈអង្គការសម្ព័ន្ធបញ្ញវ័ន្តមូស្លីម​កម្ពុជា សហការជា​មួយអង្គការក្រុមប្រឹក្សាឥស្លាមអភិវឌ្ឍកម្ពុជា។

ឯកឧត្តម បន្តថា ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា ដែលមានសម្តេច​តេ​ជោ ហ៊ុន សែន ជានាយករដ្ឋមន្ត្រី ប្រជាពលរដ្ឋខ្មែរឥស្លាមទទួលបានសិទ្ធិសេរីភាពពេញលេញក្នុង​ការគោរពប្រតិបត្តិសាសនា និងការកសាងហេដ្ឋារចនាសម្ព័ន្ធលើវិស័យសាសនា ដូចជា សាលា​រៀន និងវិហារឥស្លាមជាដើម ដូចដែលយើងបានឃើញនូវសមិទ្ធផលដ៏ធំនាថ្ងៃនេះ សិទ្ធិសេរី​ភាព​ជំនឿសាសនា និងជាពិសេស សន្តិភាពពិតជាមានសារៈសំខាន់និងមានតម្លៃ ដែលធ្វើអោយ​សាស​នាឥស្លាមរបស់យើងរីកចម្រើនដូចសព្វថ្ងៃ។

ចំណែក ឯកឧត្តម YB Tuan Mohamad Farid Bin Mohamad Khalid ប្រធានទទួលបន្ទុក​កិច្ច​ការ​ឥស្លាមនៃរដ្ឋជូហូរ ក៏បានចូលរួមអបអរសាទរ ដែលគម្រោងសាងសង់វិហារឥស្លាមដ៏ធំនេះ​បានចប់​សព្វគ្រប់ជាស្ថាពរក្រោមការជួយឧបត្ថម្ភនិងជ្រោមជ្រែងពីសប្បុរសជនផ្សេងៗ ពិសេសទៅដល់ ឯកឧត្តម ហូសេន មហាំម៉ាត់ហ្វារីត និងគណៈកម្មការសាងសង់ ដែលអនុវត្តគម្រោង​រហូតបាន​ជោគ​ជ័យដូចថ្ងៃនេះ។

ឯកឧត្តម ដាតុ Nooh Bin Gadut ទីប្រឹក្សានៃក្រុមប្រឹក្សាឥស្លាមនៃរដ្ឋជូហូរ ក៏បានចូល​រួមត្រេកអរជា​មួយបងប្អូនខ្មែរឥស្លាមនៅភូមិចាមលើ ដែលទទួលបានសមិទ្ធផលដ៏ល្អនេះ ហើយឯកឧត្តម បាន​ផ្តល់អនុសាសន៍អោយបងប្អូនទាំងអស់ចូលរួមថែរក្សាវិហារនេះ និងជាពិសេស ថែរក្សាជំនឿរបស់​យើងអោយបានមុតមាំតាមមាគ៌ា Ahlus Sunnah Wal Jama’ah Al-Asya’irah Wal Maturidiyah។

ដោយឡែក លោកឧកញ៉ា សុះ កំរី ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា ដែលអញ្ជើញចូលរួមជាកិត្តិយសក្នុងពិធីប្រគល់ទទួលវិហារឥស្លាម ដារុល តាក់ហ្ស៊ីម នាពេលនេះ ក៏បានសម្តែងនូវក្តីសោមនសរីករាយជាមួយបងប្អូនប្រជាពលរដ្ឋខ្មែរឥស្លាមនៅភូមិចាមលើ ដែល​ទទួលបានវិហារដ៏ធំ និងស្រស់ស្អាត អាចនិយាយបានថា ជាវិហារធំទី២និងមានតម្លៃថ្លៃ​បន្ទាប់​ពី​វិហារអាល់សារកាល់ បឹងកក់។

លោកឧកញ៉ា សុះ កំរី បានថ្លែងអំណរគុណយ៉ាងជ្រាលជ្រៅដល់ក្រុមប្រឹក្សាឥស្លាមនៃរដ្ឋជូហូរ និង​ឯកឧត្តម ហូសេន មហាំម៉ាត់ហ្វារីត និងសប្បុរសជនទាំងអស់ដែលបានចូលរួមកសាងវិហារនេះ​និង​សូមបួងសួងពីអល់ឡោះជាម្ចាស់អោយប្រទានពរជ័យទៅដល់គ្រប់ៗគ្នា។

លោកឧកញ៉ា សុះ កំរី ក៏បានសម្តែងនូវការត្រេកអរដែល ដាតុ Nooh Bin Gadut លើកទឹកចិត្តនិងជំរុញអោយប្រជាពលរដ្ឋខ្មែរឥស្លាមចូលរួមថែរក្សាវិហារ និងជាពិសេស គោរពប្រតិបត្តិតាម​មា​គ៌ា Ahlus Sunnah Wal Jama’ah Al-Asya’irah Wal Maturidiyah ដែលមានតម្លៃថ្លៃលើស​ពីតម្លៃ​វិហារនេះទៅទៀត៕

 

Please follow and like us:
Follow by Email
YouTube
YouTube
Instagram
Telegram
Tiktok