ឧត្តមភាពយប់ឡៃឡាតុលក៏ទើរ

១-ជាយប់ដែលអល់ឡោះបញ្ចុះគម្ពីអាល់គួរអាន ។
قال اللَّه تعالى: ﴿إِنَّا أَنْزَلْنَاهُ فِي لَيْلَةِ الْقَدْرِ﴾ [سورة القدر(1)]
អល់ឡោះមានបន្ទូលថា ៖ « ពិតណាស់ យើងបានបញ្ចុះគម្ពីរគួរអាននៅក្នុងយប់ឡៃឡាតុលក៏ទើរ » ។ [អាល់ក៏ទើរ : ០១]
២-ជាយប់ដែលពោរពេញទៅដោយភាពចំរុងចំរើន ។
وقال تعالى: ﴿إِنَّا أَنْزَلْنَاهُ فِي لَيْلَةٍ مُبَارَكَةٍ﴾ [سورة الدخان(3)]
អល់ឡោះមានបន្ទូលថា ៖ « ពិតណាស់ យើងបានបញ្ចុះវា(គួរអាន) នៅក្នុងយប់ដែលពោរពេញទៅដោយភាពចំរុងចំរើន » ។ [អាត់ទូខន : ០៣]
៣-ជាយប់ដែលការធ្វើអ៊ីហ្ពាឌាត់ល្អជាងយប់ធម្មតា១០០០ខែ ។
قال اللَّه تعالى: ﴿لَيْلَةُ الْقَدْرِ خَيْرٌ مِنْ أَلْفِ شَهْرٍ﴾ [سورة القدر(03)]
អល់ឡោះមានបន្ទូលថា ៖ « យប់ឡៃឡាតុលក៏ទើរ គឺជាយប់មួយដែលល្អប្រសើរជាង១០០០ខែ » ។ [អាល់ក៏ទើរ : ០៣]
មានន័យថា ៖ រាល់ការធ្វើអ៊ីហ្ពាឌាត់នៅក្នុងយប់ដ៏ពិសិដ្ឋនោះ ដូចជា សឡាត សូត្រអាល់គួរអាន ស៊ីកៀរ ទូអា និងអំពើល្អផ្សេងៗក្នុងយប់នោះ គឺប្រៀបដូចជាអ្នកបានធ្វើអ៊ីហ្ពាឌាត់ចំនួន១០០០ខែ បើសិនជាប្រៀបធៀបទៅនឹងយប់ផ្សេងៗដែលមិនមែនជាយប់ឡៃឡាតុលកទើរ ហើយចំនួន១០០០ខែ គឺស្មើនឹង ៨៣ឆ្នាំ ៤ខែ ។
៤-ជាយប់ដែលម៉ាឡាអ៊ីកាត់ចុះមកផែនដី នាំមកជាមួយនូវប្រការល្អ ភាពចំរុងចំរើន ក្តីមេត្តាករុណា និងការអភ័យទោសពីអល់ឡោះ ។
قال اللَّه تعالى: ﴿تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِمْ مِنْ كُلِّ أَمْرٍ﴾ [سورة القدر(4)]
អល់ឡោះមានបន្ទូលថា ៖ « បណ្ដាម៉ាឡាអ៊ីកាត់ និងជីព្រេលបានចុះនៅក្នុងយប់នោះតាមការអនុញ្ញាតពីម្ចាស់របស់ពួកគេ ដើម្បីអនុវត្តរាល់បទបញ្ជា » ។ [អាល់ក៏ទើរ : ០៤]
យប់ឡៃឡាតុលក៏ទើរ ជាយប់ដែលម៉ាឡាអ៊ីកាត់ច្រើនបំផុតចុះមកផែនដីនេះ ដោយក្នុងនោះក៏មានជីព្រេលចុះមកជាមួយផងដែរ និងជាយប់ដែលពោរពេញដោយប៉ារ៉កាត់ និងរ៉ហម៉ាត់។ វត្តមានដ៏ច្រើនរបស់ម៉ាឡាអ៊ីកាត់ដែលចុះពីលើមេឃមកផែនដី រហូតធ្វើឲ្យដួងអាទិត្យរះពេលព្រឹកគ្មានរស្មីចែងចាំង ដែលមនុស្សអាចមើលនឹងភ្នែកបាន ។
៥-ជាយប់ដែលពោរពេញដោយសុខសន្តិភាព ពុំមានប្រការអាក្រក់ឡើយ ។
قال اللَّه تعالى: ﴿سَلَامٌ هِيَ حَتَّىٰ مَطْلَعِ الْفَجْرِ﴾ [سورة القدر(5)]
អល់ឡោះមានបន្ទូលថា ៖ « នៅក្នុងយប់នោះ គឺពោរពេញទៅដោយសេចក្ដីសុខសន្តិភាពរហូតដល់ពេលសេតារុណរះ » ។ [អាល់ក៏ទើរ : ០៥]
៦-ជាយប់ដែលពោរពេញដោយការអភ័យទោសពីអល់ឡោះ សម្រាប់បាបកម្មនានាដែលសាងកន្លងមក ។
وَعَنْ أَبي هُريرةَ رَضِيَ اللَّه عَنْهُ ، عن النَّبِيِّ صَلّى اللهُ عَلَيْهِ وسَلَّم قال : « مَنْ قام لَيْلَةَ القَدْرِ إِيماناً واحْتِسَاباً ، غُفِر لَهُ ما تقدَّم مِنْ ذنْبِهِ » متفقٌ عليه .
អំពី អាពូហ៊ូរ៉យរ៉ោះ رَضِيَ اللَّه عَنْهُ ថា : រ៉ស៊ូលុលឡោះﷺមានប្រសាសន៍ថា ៖ « បុគ្គលណាដែលបានសឡាតតារ៉វេហក្នុងយប់ឡៃឡាតុលក៏ទើរដោយមានជំនឿ និងប្រាថ្នាចង់បានប៉ះឡាពីអល់ឡោះ នោះអល់ឡោះនឹងអភ័យទោសចំពោះបុគ្គលនោះរាល់ទុស្សាទាំងអស់ដែលគាត់បានធ្វើកន្លងមក » ។
យប់ឡៃឡាតុលក៏ទើរ ជាយប់ដ៏មហាពិសិដ្ឋ និងអស្ចារ្យបំផុត #ហើយវាស្ថិតនៅក្នុង១០យប់ចុងក្រោយនៃខែរ៉ម៉ាឌន ដូច្នេះហើយ នៅពេល១០យប់នោះចូលមកដល់ ណាពីមូហាំម៉ាត់ﷺលោកតែងតែនៅរហូតដល់ភ្លឺដើម្បីធ្វើអ៊ីហ្ពាឌាត់ ។
ដោយយោងលើហាទីស អាអ៊ីស្ហះ رَضَيَ اللَّه عَنْهَا ដែលគាត់បាននិយាយថា ៖ « រ៉ស៊ូលុលឡោះﷺបានខិតខំប្រឹងប្រែងធ្វើការគោរពសក្ការៈនៅក្នុងខែរ៉ម៉ាឌនជាងខែផេ្សងៗទាំងអស់ ហើយលោកខិតខំប្រឹងប្រែងនៅ១០យប់ចុងក្រោយនៃខែនេះជាងពេលផេ្សងៗទៀតទាំងអស់ » ។
عَنْ عَائِشَةَ رَضَيَ اللَّه عَنْهَا قَالَتْ : كَانَ رَسُولُ اللَّهِ صَلّى اللهُ عَلَيْهِ وسَلَّم يَجْتَهِدُ فِي رَمضانَ مَالا يَجْتَهِدُ في غَيْرِهِ ، وفي العَشْرِ الأَوَاخِرِ منْه ، مَالا يَجْتَهدُ في غَيْرِهِ » رواهُ مسلمٌ .
ហើយអំពី អាអ៊ីស្ហះ رَضَيَ اللَّه عَنْهَا ដែរថា ៖ « រ៉ស៊ូលុលឡោះﷺនៅពេល១០យប់ចុងក្រោយនៃខែរ៉ម៉ាឌនចូលមកដល់ លោកនៅរហូតដល់់ភ្លឺ ដាស់គ្រួសារ ខិតខំប្រឹងប្រែងធ្វើការគោរពសក្ការៈទៅចំពោះអល់ឡោះ និងចងរឹតចងេ្កះខោ (មិនរួមដំណេកជាមួយភរិយា) » ។
عَنْ عَائِشَةَ رَضَيَ اللَّه عَنْهَا ، قَالَتْ : كَانَ رسُول اللَّهِ صَلّى اللهُ عَلَيْهِ وسَلَّم : « إِذا دَخَلَ العَشْرُ الأَوَاخِرُ مِنْ رمَضَانَ ، أَحْيا اللَّيْلَ ، وَأَيْقَظَ أَهْلَه ، وجَدَّ وَشَدَّ المِئزرَ » متفقٌ عليه .
ដូច្នេះ ស៊ុណ្ណះសំរាប់មូស្លីមីនទាំងប្រុសទាំងស្រីត្រូវយកចិត្តទុកដាក់ធ្វើអ៊ីហ្ពាឌាត់ក្នុង១០យប់ចុងក្រោយនៃខែរ៉ម៉ាឌន ដូចជា ៖ សូត្រអាល់គួរអាន សឡាតតារ៉វេហ ទូអា និងការងារល្អផ្សេងៗ គឺដើម្បីយកគំរូតាមរ៉ស៊ូលុលឡោះ និងដើម្បីជួបយប់ឡៃឡាតុលក៏ទើរ ពីព្រោះជាយប់ដែលអល់ឡោះបានមានបន្ទូលថា ល្អជាងយប់ធម្មតាដល់ទៅ១០០០ខែ មានន័យថា រាល់ការងារល្អដែលបានធ្វើក្នុងយប់នោះ ល្អជាងការងារដែលធ្វើក្នុងយប់ធម្មតាៗលើសពី ៨៣ឆ្នាំ ។
ដើម្បីចំណេះដឹងបន្ថែមទាក់ទងនឹងយប់ឡៃឡាតុលក៏ទើរ សូមចុចអានតាម Link ខាងក្រោម ៖
May be an image of one or more people and text
Please follow and like us:
Follow by Email
YouTube
YouTube
Instagram
Telegram
Share via
Copy link
Powered by Social Snap